ألى جريوا ورا احلمهم قبلك ... ماطلوهاش
طب ليه ... ألى قالى ملحقتهاش ... و ألى يأس و ألى شاف ان الطريق ليها طويل فقال بلاش ... مبدهاش
حيرونى ... اجرب حظى و ايه الأزمة ... ولا بلاش ... ملهاش لزمة
قلت خلاص ... هقول حلمى لكل الناس ... و مش مستنى هتاف
انا بس عايز اعرف ... حلمى له لزمة ... ولا اديلوا بالجزمة
بس انا مش هقول الحلم كده و خلاص ... لازم اوصل رسالة ينقلها كل الناس
لازم اقول الحق
لازم اقول انا شفت ايه خلانى احلم ... خلانى اندم
خلانى اقول ازاى تسيب بلدك جفاف
و ارجع و اقول حلمى البسيط ... انا مستعد استغنا عنه ... بس اوعدونى ... تحاولوا تفهمونى
انا شفت طفلين ... طفل فيهم من غير هدوم ... يجرى و يقوم و يبتسم و كأنه ملك الكون
رغم انه مولود وسط كومة زبالة ... انا قلت استحالة
لكن اما شفت الطفل التانى و هو حزين ... شفته فين ... شفته جوا مول ماسك ال بلاى ستاشن ف ايديه
سألته ... زعلان ليه ... قالى باظ و انا مش بعرف العب غير عليه
قلت لأ ... ده جنان ... مين المفروض يبقى فرحان ... و مين زعلان
طب احكيلكم حاجه كمان
داخل قهوة قابلت شاب شكله ابن ناس ... بس محتاس ... مش لاقى شغل
قلت يمكن امكنياته ضعيفة ... قالولى لا ... ده بيتكلم اربع لغات ... و كمان مهندس و اخترع و مألف كتاب
قلت ازاى
و احكى كمان
اتخرجت من الكلية و كلى امال ... بفكر و اخطط للمستقبل قدام
قلت اتجوز بدرى ... قالولى اوهام ... انت متعرفش الشقة دلوقتى بكام
طب بلاش ... الحق اشتغل بدرى و احوش
قالولى يا ريت المهم خلصت جيشك
قلتلهم لا ... قالولى يبقى بلاش
منستغناش
:)
طيب انا بقى هحلم
ينفع تقول للحلم لأ ... قالوا لأ احلم براحتك ... بس اول متفكر تحقق انسى راحتك
قلت اكيد م انا لازم اتعب
ألى خلا صوتى اتكتب على بطاقة انتخاب رغم انى كنت فبيتى ... و ألى خلا الناس تأدى جيشها بدون سبب
و ألى خلى الفقر كل يوم مالى البلد ... يطلع المسئول يقول ... الدنيا فل
انتوا مش شايفين عدد العربيات ... و كام واحد عنده نت و موبيلات
شكله نسى كام واحد بيركب موصلات
انا قلت ابدء بنفسى
بدل مأسد نفسكم و نفسى
انا قررت انمى و اساعد ... بدل م انا قاعد
لما ابتسم بساعد
لما بربى صح بساعد
لما اصون عرضى و شرفى بساعد
لما امد قيدى للفقير ... لما اراعى الامانة حتى لو كنت الوزير
لما انام و اقول الحمد لله ... هضمن ان الظلم مش باقى
و حتى لو باقى ... ربى هيتولاه
اوعدونى تحلموا
حلم بسيط
حلم عبيط
انا عارف ان فى منا ألى نام
و فى ألى تاه
اعمل ألى عليك و الباقى
ربى هيتولاه
ربى ... ربى .. ربى
No comments:
Post a Comment